Ֆրանչիսկոս Սրբազան Քահանայապետի գործունէութիւնը` ''Յարատեւել երկխօսութեան ճանապարհով''։

(Ռ.Վ. 13 նոյեմբեր 2014) Հինգշաբթի, 13 նոյեմբեր 2014-ի առաւօտեան Ֆրանչիսկոս Սրբազան Քահանայապետը իր գրասենեակին մէջ ընդունեց Աւստրիոյ դաշնակցային հանրապետութեան նախագահը` Տիար Հէյնզ Ֆիշէր, անոր կողակիցը եւ իրենց ընկերացող շքախումբը։ Նորին Սրբութիւնը ապա յաջորդաբար ընդունեց` Կարդինալ Քիւրդ Քոխը, քրիստոնեաներու միութեան Քահանայապետական խորհուրդի նախագահը, Կարդինալ Ռոպէրդ Սարան, Քոր Ունում քահանայապետական բարեսիրական մարմնի նախագահը եւ գերապայծառ Ժոզէֆ Մարինոն` Մալաիզիայի առաքելական նուիրակը։
Իսկ երէկ` չորեքշաբթի, 12 նոյեմբեր 2014-ի առաւօտեան, Ֆրանչիսկոս Սրբազան Քահանայապետը նախ քան չորեքշաբթի օրուայ հրապարակային ունկնդրութիւնը, հանդիպեցաւ ''Կաթողիկէ – Մահմետական Ֆորումի'' երեսուն հոգիէ կազմուած պատուիրակութեան մը որոնք հռոմի մէջ կը մասնակցին ''միասին աշխատիլ ուրիշներուն ծառայելու'' բնաբանով հանդիպումի մը, ու անոնց ուղղած հակիրճ խօսքին մէջ հրաւիրեց յարատեւել երկխօսութեան ճանապարհով։